蟹膏蟹肉粥

如果你時間太多，因為疫情困在家中、WFH、居家抗疫變廚神，可以試吓煲呢個蟹粥。

【準備材料】

• 膏蟹，肉蟹，花蟹(隨你喜歡)
• 白米
• 青葱
• 胡椒粉
• 麻油
• 鹽

1. 選擇蟹：最好mix 起碼兩種蟹，今日見潮洲花蟹幾靚，加埋膏蟹就最有層次。

1. 先煲粥，米要加水浸油及鹽兩三個小時，煲的時候可以加幾片薑，同時處理蟹膏，挑出蟹膏，主要係想啲膏最後先落，唔會煮到太硬，影響口感。蟹膏要放入雪櫃待用。(其實亦可以先烚蟹，用烚完蟹的水煲粥，視乎個人喜好)

1. 將切件的蟹放入煲緊的白粥，顏色一轉(熟)就可以夾起啲蟹，拆肉，係要拆好耐㗎，不過成啖粥無殼係好爽喎。

1. 途中要耐唔耐搞吓煲粥，一痴底就有燶味，成煲粥唔要得。

1. 倒哂啲蟹肉落去，粥嘅稀杰程度因個人喜好，煲多一陣落少少麻油同適量的鹽。

1. 最後，成碗蟹膏倒落去，煮多2－3分鐘，食時可加啲蔥。
2. 可以烚一、兩隻咸蛋切細細粒臨尾放埋落煲粥，咁就不用加鹽了。

*難就唔係好難，主要係心機耐性同埋唔好煲燶粥。

🦀 成煲黃色的極鮮味蟹肉蟹膏粥真係食唔停口。淨係拆蟹肉已經拆咗幾個鐘⋯⋯